ಯಾಕೋ ಅತ್ತುಬಿಡುವಷ್ಟು
ಒಲವಾಗಿದೆ ಗೆಳತಿ...

ಅತ್ತಿಂದಿತ್ತ ತಿರುಗಾಡುವಾಗ
ಸುಮ್ಮನೆ ನಿನ್ನ ಹೆಸರು ಗುನುಗುನಿಸಿಯೋ....

ಅದ್ಯಾವುದೋ ಪಾಪಿ-ಹಾಡು ಕೇಳುತ್ತಾ
ಬೇಕಂತಲೇ ನಿನ್ನ ಮುಖವ ಕಲ್ಪಿಸಿಕೊಂಡೊ...

ಸಣ್ಣನೆ ಸುರಿವ ಮಳೆಹನಿ,
ಎಳೆ ಎಳೆಯಾಗಿ,ನಿನ್ನ ಮುಖದ ಮೇಲೆ
ಹರಿವ ಚಿತ್ರವ,ಎದೆಯಲ್ಲಿ ಚಿತ್ರಿಸಿಕೊಂಡು
ಚಳಿಯ ಸಂಜೆಯಲಿ,ಬೆಚ್ಚಗಾದಗಲೋ...

ಅದ್ಯಾವುದೋ ಗುಂಪಿನಲಿ ಬೇಕಂತಲೇ
ನಿನ್ನ ಹಿಂದೆ,ಉಸಿರು ತಾಕುವಷ್ಟು
ಹತ್ತಿರ ನಿಂತು,
ನೀ ಬೆಚ್ಚಿ,ಹಿಂದೆ ತಿರುಗಿದಾಗ
ಮುಗ್ಧನಂತೆ ನಟಿಸಿ, ದೂರ ನಿಂತಾಗಲೋ....

ಯಾವುದೋ ಮಾತಿನ ನೆಪದಲ್ಲಿ
ನಿನ್ನ ಕಣ್ಣಲ್ಲಿ ನನ್ನ ಬಿಂಬ ಕಾಣುವಷ್ಟು
ನಾನಿನ್ನ ಸನಿಹ ಬಂದು,
ಇನ್ನೇನು ನೀ ನಾಚಿ
ಕಣ್ಮುಚ್ಚುವಷ್ಟರಲ್ಲಿ,ದೂರ ನಿಂತು
ನಕ್ಕಾಗಲೋ......