ಇದೆಲ್ಲಾ ಪ್ರೀತಿಯಾ

ಅಥವಾ ನನ್ನ ಗೊಂದಲಕ್ಕೆ ನಾ ಕೊಟ್ಟ ಹೆಸರಾ?

ಸರಸರನೆ ಸುರಿವ ಮಳೆಯಲಿ

ನೀ ನನ್ನತ್ತ ಕೈ ಚಾಚಿದಂತಾಗಿ

ಮಳೆಯಲಿ ಒಂದಾಗಿ ಕುಣಿದು

ಮರುಕ್ಷಣ ನೀ ಭ್ರಮೆ

ಯೆಂದರಿತು

ಮನದೊಳಗೇ ಮುಗುಳ್ನಗುವುದು ಪ್ರೀತಿಯಾ 

ಗೊಂದಲವಾ?

ಮಾತಿನ ನಡುವೆ ನಿನ್ನ

ಕೈ ಸೋಕಿದಾಗ

ನುಗ್ಗಿ ಬರುವ ಖುಷಿಯನ್ನು

ಒತ್ತಾಯದಿಂದ

ಮುಚ್ಚಿಡುವ ನಾನು ಪ್ರೀತಿಯಾ

ಅಥವಾ ಗೊತ್ತಿದ್ದೂ

ನನ್ನ ಬೇಕಂತಲೇ

ಸ್ಪರ್ಶಿಸಿ ದೂರ ನಿಂತು ನಗುವ

ನೀನು ಪ್ರೀತಿಯಾ?

ಮೆಸ್ಸೇಜಿನ ತುದಿಯಲ್ಲಿ ಆಗಾಗ

ಮಿಂಚುವ ಡಿಯರ್ ಗಳಿಗೆ

ಜಾತಕಪಕ್ಷಿಯಾಗುವ

ನನ್ನ ಬೇಕಂತಲೇ

ಸತಾಯಿಸುವ

ನಿನ್ನ ತುಂಟತನ

ಪ್ರೀತಿಯಲ್ಲವಾ?